CHP LGBTQİ+lara qarşı ayrı-seçkiliyin aradan qaldırılacağına söz verib

Türkiyənin ana müxalifət partiyası olan Cümhuriyyət Xalq Partiyası (CHP) seksual oriyentasiya və gender kimliyi əsaslı ayrı-seçkiliklə mübarizə aparacağını öhdəsinə götürən yeni parti proqramını yekdilliklə qəbul edib. Bu qərar partiyanın Ankara Arenada “Şimdi iktidar zamanı” şüarı ilə keçirilən 39-cu qurultayının ilk günündə elan olunub. Bu barədə, Kaos GL məlumat verib.

Qurultay tamaşaçısız açılıb, səhnədə isə həbsdə olan bələdiyyə başçılarının fotoları və qadınların əl işindən hazırlanmış “Öncə ədalət, öncə hürriyyət” pankartı yer alıb. İlk gün partiyanın yenilənmiş proqramı səsverməyə çıxarılıb və təsdiqlənib. Proqramda altı əsas istiqamət müəyyənləşdirilib: Demokratiya, İdarəetmə və Ədalət, İnkişaf, Sosial Dövlət, Xarici Siyasət, Təhlükəsizlik və Müqavimət.

Ayrı-seçkiliyin aradan qaldırılması öhdəliyi

Yeni proqramda LGBTQİ+ qısaltması birbaşa yer almasa da, “Demokratiya üçün Ayrı-seçkilikə Mübarizə və Plüralizm” bölməsində seksual oriyentasiya və gender kimliyi əsaslı ayrı-seçkiliyin qarşısının alınacağı xüsusi vurğulanır. Sənəddə dövlətin hər bir vətəndaşa özünü “bərabər və ləyaqətli” hiss etdirən bir sistem quracağı bildirilib:

“Yaşına, genderinə, kimliyinə, inancına, gender kimliyinə və seksual oriyentasiyasına, sosial-iqtisadi vəziyyətinə, əlilliyinə, dünyagörüşünə, həyat tərzinə və ya oxşar səbəblərə görə heç kimin təcrid olunmadığı və ya zülm edilmədiyi bir sistem qurulacaq. Əsas prioritetimiz heç bir vətəndaşın kimliyini gizlətməyə məcbur edilməməsini təmin etmək olacaq.”

Proqram həmçinin dil və mədəni müxtəlifliyin qorunmasının, fərqli kimliklərin sərbəst yaşanmasının “ictimai sülhün təminatı” olduğu qeyd olunub.

Powered by Froala Editor