ABŞ-da trans qadın küçədə güllələnib

Polis Miçiqan ştatının Detroit şəhərində səkidə tapılan trans qadının ölümcül şəkildə güllələndiyini deyib. Hadisənin ABŞ-da bu il trans şəxsin 22-ci faciəli qətli olduğu bildirilib.

Hələlik kimliyi məlum olmayan qadının cəsədi bazar ertəsi 25 iyulda qonşusunun evinin yaxınlığında səkidə tapılıb.

Click On Detroit qadının axşam saat 11 radələrində adyala bükülmüş vəziyyətdə tapıldığını və polisin qadının bir neçə dəfə güllələndiyini müəyyən etdiyini bildirib.

Şahidlər xəbər portalına verdiyi məlumatda qadının avtomobildən özünü atdığını və atəşə məruz qalarkən təqib olunduğunu bildiriblər.

İstintaq davam edir və yarılmadan əvvəl qadının kimliyini müəyyən etməyin hələlik mümkün olmadığı bildirilib.

Qadının bu il ABŞ-da öldürülən 22-ci trans şəxs olduğu ehtimal olunub.