Qazaxıstan  Senatı “anti-LGBTİ təbliğat” paketini təsdiqləyib

Qazaxıstan hökuməti milli qanunvericiliyə “LGBTİ təbliğatı” adı altında geniş məhdudiyyətlər gətirən mübahisəli dəyişiklikləri irəli sürməsindən sonra insan hüquqları qrupları və beynəlxalq tərəfdaşların artan tənqidi ilə üz-üzə qalıb.

Dekabrın 18-i Qazaxıstan Respublikasının Senatı dəyişikliklər paketini təsdiqləyib. Tənqidçilər bildirirlər ki, bu addım ifadə azadlığına, medianın müstəqilliyinə və məlumat əldə etmək hüququna ciddi zərbə vura bilər. Qanun layihəsi indi imzalanmaq və ya rədd edilmək üçün Prezident Kasım-Jomart Tokayevin qərarını gözləyir.

Rəsmi arqumentlərdə dəyişikliklər “ənənəvi dəyərlərin qorunması” kimi təqdim edilsə də, vətəndaş cəmiyyəti təşkilatları qanunda “təbliğat” anlayışının qəsdən qeyri-müəyyən və geniş tutulduğunu vurğulayır. Hüquqşünaslar hesab edirlər ki, bu qeyri-müəyyənlik dövlət orqanlarına qanunu LGBTQİ+ məsələlərindən kənarda da tətbiq etmək üçün geniş səlahiyyət verir və nəticədə, senzura mexanizmini dərinləşdirir.

İnsan hüquqları müdafiəçilərinə görə, təklif olunan çərçivə jurnalistika, təhsil, səhiyyə, psixoloji dəstək, mədəniyyət və ictimai sağlamlıqla bağlı məlumatların paylaşılmasına təsir göstərə bilər. Media qurumları, müəllimlər, həkimlər, hüquqşünaslar və vətəndaş cəmiyyəti təşkilatları gender, seksual orientasiya və ya ayrı-seçkilik mövzularına toxunduqları üçün hüquqi təzyiqlə üzləşə bilərlər.

ILGA-Avropa daxil olmaqla bir sıra beynəlxalq hüquq müdafiə təşkilatları bu qanunvericiliyin post-sovet məkanının digər ölkələrində qəbul edilmiş oxşar “anti-təbliğat” qanunlarını xatırlatdığını bildirir. Həmin ölkələrdə bu tip qanunlar sonradan müxalif səslərin susdurulması və azlıqların stigmatizasiyası üçün istifadə edilib. Analitiklər qeyd edirlər ki, LGBTQİ+ icmasının hədəf seçilməsi, əslində, daha geniş vətəndaş məkanını daraltmaq üçün mənəvi panikanın siyasi alətə çevrilməsidir.

Powered by Froala Editor