Grok süni intellekt botu qadın və qızların razılığı olmadan “soyundurulmuş” görüntülərini yaradır

Son günlərdə X platformasında istifadə olunan Grok adlı süni intellekt çatbotu ciddi etik və hüquqi narahatlıqlara səbəb olub. İstifadəçilər Grok-a qadınların fotolarını yükləyərək onları razılıq olmadan alt paltarı, bikini geyimində, bədənləri maye ilə örtülmüş, qorxu içində və ya zorakılığa məruz qalmış kimi göstərən görüntülər yaratdırıblar. Araşdırmalara görə, bu görüntülər arasında (süni intellekt tərəfindən yaradılmış) uşaqların təsvirləri də yer alıb.

Müzakirələr keçən həftə sosial mediada yayılan ekran görüntülərindən sonra başlayıb. İstifadəçilər real qadın fotoları üzərində “paltarlarını çıxar”, “ayaqlarını aç”, “bədənini göstər” kimi açıq-aşkar seksual və zorakılıq çağırışları olan göstərişlər veriblər. Bu cür əmrlərin Grok tərəfindən yerinə yetirilməsi razılıq anlayışının tamamilə görməzlikdən gəldiyini göstərir.

Sosial mediada yayılan bir paylaşımda istifadəçilərdən biri yazıb: “X-in insanların razılığı olmadan bu cür görüntülərin yaradılmasına icazə verməsi dəhşətlidir və iyrənc davranışdır.” Bu fikir qısa müddətdə geniş dəstək qazanıb.

Maraqlıdır ki, bu qalmaqal fonunda Elon Musk Grok-un tətbiq mağazalarındakı yüksəlişini paylaşaraq, əsasən gənc və arıq qadınların açıq-saçıq süni intellekt görüntülərini yenidən yayımlayıb. Analitik şirkətlərin məlumatına görə, Grok-un gündəlik yüklənmə sayı bir neçə gün ərzində 54 faiz artıb.

Qadın hüquqları müdafiəçiləri, texnologiya üzrə müşahidəçi qurumlar və bir sıra beynəlxalq təşkilatlar bildirirlər ki, bu hadisə X platformasının süni intellektdən məsuliyyətsiz və təhlükəli şəkildə istifadə etdiyini bir daha sübut edir. Digər texnologiya şirkətləri bu cür sui-istifadələrin qarşısını almaq üçün sərt mexanizmlər tətbiq etdiyi halda, X-in adekvat məhdudiyyətlər qoymaması ciddi suallar doğurur.

Powered by Froala Editor