Conchita Wurst Avroviziyadan uzaqlaşdığını açıqlayıb

Yanvarın 13-də avstriyalı sənətçi Conchita Wurst (Thomas Neuwirth) Avroviziya Musiqi Müsabiqəsi ilə bağlı tədbirlərdə artıq iştirak etməyəcəyini və müsabiqədən məsafə saxladığını bəyan edib.

Açıqlama müsabiqənin pərəstişkarları arasında məyusluqla qarşılanıb. Çünki Avroviziya 2026 Avstriyanın paytaxtı Vyanada keçiriləcək və müsabiqənin 70 illik yubileyinə təsadüf edəcək. Bir çoxları Conchita Wurst-un yubiley proqramının əsas simalarından biri olacağını gözləyirdi.

Bundan əvvəl Avstriyanın ictimai yayımçısı ORF də açıq şəkildə Conchita-nın 2026-cı ilin mayında keçiriləcək tədbirlərin bir hissəsi olacağına ümid etdiyini bildirmişdi. Lakin sənətçinin son açıqlaması bu ehtimalları aradan qaldırıb.

Thomas Neuwirth Instagram paylaşımında qərarını belə izah edib: “Bu müsabiqə həyatımı formalaşdırıb. Bu mənim səhnəm, evim idi — və bunun üçün dərindən minnətdaram. Bir sənətçi kimi dəyişiklik mənim üçün vacibdir. Bu andan etibarən ‘Avroviziya’ kontekstindən çıxıram. Digər peşəkar layihələrə fokuslanmaq və başqa sahələrdə inkişaf etmək istəyirəm. Müsabiqə ilə bağım tariximin bir hissəsi olaraq qalır, lakin növbəti addımlarım üçün bir məkan deyil. Bu şəxsi qərardır və mən onu daha şərh etməyəcəyəm.”

Conchita Wurst 2014-cü ildə “Rise Like a Phoenix” mahnısı ilə qalib gəldikdən sonra qlobal səviyyədə tanınmış, sonrakı illərdə isə Avroviziya ilə bağlı müxtəlif layihələrdə və xüsusi proqramlarda dəfələrlə yer almışdı.

Bu açıqlama Avroviziya ətrafında artan siyasi gərginlik fonunda səslənib. Dekabrın əvvəlində İspaniya, Niderland, İrlandiya və Sloveniyanın ictimai yayımçıları Avroviziya 2026-nı İsrailin müsabiqədə iştirakına etiraz olaraq boykot edəcəklərini elan ediblər. Daha sonra İslandiya da analoji qərar verdiyini açıqlayıb.

Powered by Froala Editor