Kaos GL redaktoru Türkiyədəki cadugər ovları haqqında yazır

4 fevral 2026-cı il tarixində Türkiyədə, KaosGL.org-un redaktoru Oğulcan Özgenç LGBTQİ+ sosial media fenomenlərinə qarşı son dövrdə aparılan polis əməliyyatlarını və həbsləri təhlil edən məqalə ilə çıxış edib. Müəllif yazısında bu həbslərin ictimaiyyətə açıq, “nümayişkəranə” və “ibrətamiz” formada təqdim edildiyini, proseslərin xüsusilə LGBTQİ+ kimlikləri hədəf aldığını vurğulayıb.

Son aylarda Türkiyə mediasında tez-tez yayımlanan “narkotik əməliyyatları” xəbərləri əsasən sosial mediada tanınan şəxslərin adları üzərindən qurulub. Yerli mənbələrin yazdığına görə, bu xəbərlərdə sistemli cinayət şəbəkələri və ya iqtisadi əlaqələr deyil, ictimaiyyətə tanış simalar ön plana çıxarılır. Bu kontekstdə LGBTQİ+ fenomenlərin hədəfə çevrilməsi, dövlətin “mübarizə” görüntüsünü fərdi fiqurlar üzərindən qurduğu tənqidlərini gücləndirib.

Keçən həftə sosial media fenomeni Mika Raun-un saxlanılması və daha sonra həbs edilməsi bu prosesdə dönüş nöqtəsi kimi qiymətləndirilib. Raun saxlanılmadan əvvəl paylaşdığı bir video səbəbilə sosial mediada hədəf göstərilib. Ardınca daha əvvəl “ədəbsizlik” ittihamı ilə saxlanılan Mükremin Gezgin və Arya Bektaş-ın da “narkotik əməliyyatı” çərçivəsində yenidən saxlanıldığı bildirilib. Eyni dövrdə Murat Övüç “xalqı kin və düşmənçiliyə təhrik” ittihamı ilə həbsdə saxlanılıb, Kerimcan Durmaz isə qanunsuz mərc işi üzrə azadlıqdan məhrumetmə cəzası alıb.

Məqalədə qeyd olunur ki, bu işlərin ortaq cəhəti sosial mediada aparılan linç kampaniyaları ilə hüquq-mühafizə orqanlarının addımlarının paralel getməsidir. Hədəf göstərən paylaşımların ardınca saxlanma və həbs qərarlarının verilməsi, xüsusilə trans və qeyri-heteronormativ kimliklərə qarşı düşmənçiliyin institusional xarakter aldığını göstərir. Bu cür hallar transfobiya və homofobiyanın hüquqi proseslər vasitəsilə normallaşdırılması riski yaradır.

Yazının yekununda müəllif bu əməliyyatların təkcə fərdi şəxslərə deyil, bütövlükdə LGBTQİ+ icmasının görünənliyinə yönəldiyini bildirir. İctimai məkanda mövcudluğun “cəzalandırıldığı” bir mühitdə bu hadisələr daha geniş insan hüquqları və ifadə azadlığı kontekstində qiymətləndirilir və gələcəkdə hədəfin kim olacağı sualı açıq qalır.

Powered by Froala Editor