Özbəkistanın LGBTİ+ icması blogger və onun tərəfdarlarına edilən şiddətli hücumdan sonra ‘gizli fəaliyyətə’ keçib

Özbəkistanın LGBTİ+ icması tanınmış blogger və onun tərəfdarlarına edilən şiddətli hücumdan sonra homofobik reaksiya qorxusu ilə gizli fəaliyyətə keçdiyini söyləyib.

Miraziz Bazarov 28 martda üç maskalı şəxs tərəfindən beysbol dəyənəyi ilə vəhşicəsinə döyülməsi nəticəsində aldığı ağır xəsarətlərlə xəstəxanaya yerləşdirilib.

Blogger prezident Mirziyoyevin sərt tənqidçisidir və o, Özbəkistanda eynicinsli münasibətlərin cinayət məsuliyyətinə cəlb edilməsinə etiraz olaraq müqəddəs yerlərdə LGBTİ+ toplantıları təşkil edib.

Daha sonra qəzəbli kütlə Bazarovun təşkil etdiyi tədbirdə iştirak etməyi planlaşdıran bir neçə gəncə hücum edib, baxmayaraq ki, tədbirin LGBTİ+ məsələləri ilə heç bir əlaqəsi olmayıb.

Reuters xəbər verir ki, LGBTİ+ özbəklər Bazarovun yazılarına qarşı reaksiya verilənə qədər xeyli kənarda qalıblar, amma indi həyatlarının təhlükədə olduğunu hiss edirlər.

"Hal-hazırda bu partlayış səbəbiylə LGBT insanlar bir çox təhdidlər alır və evlərini tərk etməməyə, kafelərdə görüşməməyə çalışırlar, çoxları ölkəni tərk etmək istəyir," - icmadan olanlardan biri deyib.

"Küçələrdə hər kəsə yaxınlaşıb cinsi əlaqələri barədə sual verə biləcək quldurlar var."

Özbəkistan eynicinsli münasibətləri üç ilə qədər həbs cəzası ilə cəzalandırır və bu qanunun ləğvi barədə danışmaq hətta qanunsuz ola bilər.

Bazarova qarşı hücumdan üç gün sonra prezident ölkənin Cinayət Məcəlləsində prezidentə onlayn, media və ya şəxslər tərəfindən “təhqir və böhtan atmağı” qadağan edən qanuna dəyişiklikləri imzalayıb. Qanunvericilikdə nəyin “təhqir” kimi qiymətləndirildiyi göstərilməyib.

Yeni qanunda, eyni zamanda, gey cinsi əlaqənin “ailəyə, uşaqlara və əxlaqa qarşı” bir cinayət olduğu da nəzərdə tutulub.

Mənbə: PinkNews